Matthew 21

Yesu Wa Lo Urushelima

1Shi Yesu n wa bara yi ɓo ga Urushelima si, vivi n zhi ɓiyi hoi ai yi ko Betifaji n kpe n Zaitun pe, Yesu wa tnu wa bara gun aba ɓa lo ezhi ɓiyi, n ka zhi nkwa bye.

2Wa gna ɓa, shi fye lo, fye ɓo gye zhagawyi (jaki) gyi gni n kwo ɓi yi, fye lo ɓa fya ɓe ɓai ya. 3Ndei zaho nya fye ɓo fye zhin, fya gna, Dagayi n ɓa pma yi lo, a ɓa fa fye fya ɓe ɓai.

4Deye ɓo zhin ntu ge kwa nu anabi ɓeda nu. 5“Gna Urushelima ge Okwo Su ɓe da kwo lo, n tukwo gba yi, ntu zhagawyi ɓi yi.”

6Abara yi gun aba ɓa zhin shi Yesu ɓo da. 7Ba ɓe zhagawyi yi Inkwo ɓi yi, ɓa ta e pe n ɓi yi, Wa gun tu. 8Azaho na za-yezhi, ɓa kma ɓa ʼje ɓai ta-zhi n zokwo azahoi gba fintolo ɓai ta-zhi n Wa bye.

9Aza-yezhi nɓa ɓo gyi nabye, naza yi ɓa-ɓo nyi navun, ɓa la begye tu ɓai gna, “Shekwoyi tu Osu Dauda Nugun anabarka.” “La wo tu! Shekwoyi ‘Za la ɓe,’ Tu wo anabarka, Dagayi!”

10Aza vinya n Urushelima hankali a laka, shi wo ɓo lo zhimi lo, ɓai nya ge, “Nyikanu Wo ya?”

11Aza-yezhi ɓa gna ɓa ge, “Anabi Yesu nu n wo gmi n Nazarati Galili nya nyi.”

12Yesu wa lo-dna na duwa-nyakun wa kun a gnikwo gni yi ya. Wa mi agyiwye shan yi a tebur ya, ɓedo na lumpa yi aza nya n ɓa ɓo zhin ɓai kun alukpe nyi.

13Wa gna, “Littafi Gyi-gyi-yi a gna, ‘Ema duwa-nyakun zhin aduwa zhin ba nu, ama fye la kwo ze avi puwa.’ ”

14Wyebuayi n zabmazhi yi, ɓa ɓe wo aba na duwa-nyakun, Wa kaba gna dna ɓo. 15Ama shi a prist ɓedo na Yahudawayi atukwoda yi ɓo gye ɓo wo-woi n Wo ɓei zhin nyi, ɓa je aɓi wo ɓai la wo tu, ɓai gna, “Shekwoyi tu Dauda Nugun anabarka,” ɓa gyi minagyi, ɓa ci Wo ge, “Ho wo ɓo lo na ɓi ye zhi ɓai da nyi?”

16Yesu wa ci ɓage, “E-mi wo lo. Fye to shin Littafi Gyi-gyi-yi ban?” A ci ge, “Har aɓi putu ɓa ci wo!”

17Wa laka wa jeze-lo Betenya, wa-a wan ʼgye n bwai.

18N labmi yi, woi je ze lo Urushelima, wa wo mikun kwoi gun wo.

19Wa gye gbayi gni n zokwo gbe. Wa lo ge kpekni wo ɓa gye kwo gyi kpe, ama wa gye afintolo kawai. Wa ci kwo ge, “Ho ta shan gyi m!” Safyewyi, kwa ya bwa.

20Ca wo wa bara ɓa nya ge, “Kninya zhi gbayi yi kwa bwa wolo-wolo lo nuʼa?”

21Yesu wa gna ɓa ge, “Ɓehinhin, ndei fye gaciya gai lo, ntna shaka, fye ɓa mi fya zhan ɓeye pya har ma ndu ɓo. Fye ɓa mi fya gna Zaitun ʼpe ye ge, ‘Laka ha she dna ʼla,’ kwa zhin lo nu. 22Fye ɓa gwo nyaho-nyahoi, nfya zhan duwa ntu kwo ɓo ndei fya ga gaiciya.”

Ayahudiyi A tukwoda Agam

23Shi wo ɓo la jeze lo aduwa-nyakun, woi wu nya, a pirist dnagmai, na Yahudawayi a tukwo dayi, ɓa ɓe waba ɓai ye ɓa kpe za wo ɓo ga wo iko wa nya agnikwo gni yi ya na duwa-nyakun nyi.

24Yesu wa gna ɓa ge, “Miɓa gna fye, ndei fya gna mi ɓo Miɓa nya fye nyi kpa. 25Shekwoyi nu ɓo tnu n Yohanna batisma zhin-yi yi ko awo? Sai ɓa ya nubo zhin najei.” N ya gna n Shekwoyi aba nu wo ɓo gmi, wo ɓa nya yi ge, “Knihi nu ɓo zhin to ya ga Yohanna gaiciya ma? 26N ya gna ge Shekwoyi nu to ɓo tnu woyi m, deji ta fa yi m, ntu ge ɓa gye ge wo ɓo zhin anabi nu.” 27Ɓa gna Yesu ge, “Yi ta kpe lo m.” Wa ci ɓa ge, “Mi ta ga fye amsa ce m. 28Ama fya gye ɓeye wuna? Eza na nugun yi ngun-aba, wa gna nugun dnagmai ge, ‘Nugun, ho ɓa lo fa naiye.’ 29Wa ci ge, ‘Mi ta lo m.’ Ama sa fyewyi wa bugba shando wa lo. 30Wa gna nugun nawyi ge, ‘Lo!’ Wa gna, ‘Dada, miɓa lo.’ Ama to wa lo m. 31Aɓi ngun-aba yi, nyika nu vi wo dada ɓeye a?” Ɓa ci ge. “Ai eɓi kmisunyi nu.” Yesu wa wu ɓa wa gna, “Lalei aza nukwoyi na-kaluwa yi, ɓei ku lo Shekwoyi bemi n fya bye. 32Ntu ge Yohanna baptisma zhin yi ɓo gna fye ge fye ya bui, fya pmi da Shekwoyi to fya ye m, sai aza nukwoyi na kaluwa yi ɓa da ku ya bui! Har ma fya gye deye to fya ye abui ye ɓo fya ga gaiciya m.

33“Fye wo ɓe-sisi ye. Ekni daho ɓo nu ajemwinyi fa, wa-a ko zun kna vinya, wa aba mi, n fwa wyednai ɓa dna. Wa pmi wa ofwayi ga afwa nuyi ho n nagbai zhin zhi, wa laka wa lo ʼknido.

34“Shi ajemwinyi ɓi sa ɓo lasi, wa tnu waza ge ɓa lo ɓa gwo nya ɓewo cei, nkwo ɓa si wo. 35Ama afwa nuyi ɓa kuka da waza, ɓa lu zaho, ɓa zaho wu, ɓa she zaho akuta.

36“Waje azado tnu ndu aza akmisunyi n begye, ama ɓa bwa ɓa je zhin lo nu. 37Kmaknayi wa tnu n wo nugun yi, woi gye kpekni ɓa ɓa ga wo mwa-mwa.

38“Ama shi a fwayi ɓo gye woi ɓe, ɓa gnaje ge, ‘wo nu ɓo gyi ofwa ye gado, fye ɓe ya wu wo ntu ge ofwa ye kwa ze yi nya!’ 39Ɓa gniwo ya fwa mi, ɓa wu wo.

40“Shi of wa dayi ɓei zhi, fye gye ge wo ɓei zhin afwa nuyi yi n wuna?”

41A Yahudawayi atukwoda cige, “Wo ɓei wu aza nukwoi ntna sun-sun gye, woi pmi wa la fwa wa ga azado, n ɓa ɓa gba wo ntna sa wunya yi.”

42Yesu wa pmi wa nya ɓa, “Fye to shin ba n Shekwoyi ɓedan, ‘Kuta na nyamiyi ta ye, kwo nu la ze kusurwa kuta yakon? Degye kwo nu zhin ɓezhin-zhin wo-woyi Dagayi nya.’

43“Oɓo Mi zhin nufi cei ko nu nyia ɓei la Shekwoyi Bemi gwo fyeya, a ga ebye do n kwo ɓa ga Shekwoyi Owo fwa gyiba. 44Zaho-zahoi wa ce bonyi n kuta gaiciya nya ye, wo ɓa bmaya, ama aza n kwa kaya tu ɓa, ɓa ɓa viya ngye amwi”.

45Shi a pirist yakwo na Yahudawayi atukwoda jei ɓo ku kpe ge Yesu da ɓa nu ɓo-nge ɓanu zhin a fwai n Wo ɓe-sisi. 46Ɓa ye ɓa wan Wo, ama ɓa ku wo deji dna, n tuge ɓa ɓo gwo Yesu ngye anabi nu.